Sa halip na matamis na selebrasyon ng Araw ng mga Puso, nauwi sa eskandalo at kulungan ang isang lihim na pagtatagpo ng isang babae at kanyang kalaguyo matapos silang mahuli mismo sa akto ng nagngangalit na mister.
Ayon sa ulat mula sa Police Station 2, isang 22-anyos na ginang na si alyas “Lyn” mula sa Cotabato City at ang kanyang 18-anyos na kalaguyo na si alyas “Jun” mula sa South Upi ay nagkita sa isang kilalang inn sa lungsod para sa kanilang bawal na relasyon.
Ngunit ang kanilang matamis na pagtatagpo ay nauwi sa bangungot nang biglang sumulpot ang mister ni Lyn.
Nagtaka umano ang asawa kung bakit hindi pa umuuwi ang misis, kaya’t nagdesisyon siyang sundan ito.
At doon niya mismo naabutan ang kanyang misis at ang binatilyong kalaguyo nito—kapwa wala nang saplot.
Sa matinding galit, agad niyang pinagbubugbog ang lalaking kasama ng kanyang asawa bago dalhin ang dalawa sa himpilan ng pulisya.
Dagdag pa sa eskandalo, nadiskubre rin na kasama ng ginang ang kanyang anak sa inn, na pinatulog muna niya sa kabilang silid bago gawin ang kanilang bawal na pag-iibigan!
Ngayon, ang dapat sana’y isang maalab na Valentine’s date ay nauwi sa kulungan.
Kasong adultery ang isasampa ng mister laban sa dalawa.
The post Misis at kalaguyo huli sa akto sa isang inn sa Valentine’s Day appeared first on Bombo Radyo Cauayan.
